Та байшингаа илүү дулаахан болгоё гэвэл зуухныхаа хүчин чадлыг 2 дахин нэмэгдүүлээд илүү дулаахан болж болно. Цахилгаан тень нэмж асаагаад илүү дулаан байж болно. Гэхдээ бид үнэхээр л утааг багасгая гэвэл байшингаа дулаан алдагдалгүй болгох зайлшгүй хэрэгтэй. Байшин тань дулаан алдагдалгүй болж байж л зарцуулах эрчим хүч багасна, түлэх мод нүүрс багасна, утаа багасна. Байшингаа дулаан алдагдалгүй болгосон бол та халаалтаа юугаар ч шийдэж болно. Дулаан алдагдалгүй бол аль ч халаалт нь зардал бага байх болно.
Агаар нэвтэрч буй хэсгүүдийг тодорхойлох
Эхлээд агаар нэвтэрч, алдагдаж буй хэсгүүдийг цаасан дээр бич. Судалгаагаар байшингийнхаа битүүмжлэлийг сайжруулснаар 5-30 хувиар цахилгаан, дулааны зардлаа хэмнэх боломжтой гэж гарсан байдаг. Шууд агаар нэвтэрч байж болох Монголд ихэвчлэн тохиолддог доорх цэгүүд бий.
Та лаа эсвэл хүж асааж цонх хаалганыхаа эргэн тойрноор барьж, шууд үлээж хүйтэн агаар нэвтэрч байгаа эсэхийг шалгаж болно. Мөн нимгэн цаас, гялгар уут барьж үзсэн ч болно. Цонх, хаалга далий муруй суулгах, шахдаг хөөсийг дутуу бага шахсанаас шалтгаалж цонхны жийрэг эсвэл завсраар сийгэх нь элбэг тохиолддог. Та гэхдээ шалгаж байх явцдаа шатамхай материалын хажуугаар лаагаа барихдаа гал алдах эрсдлийг заавал бодолцож болгоомжтой байхыг сануулъя.
Туршлагагүй барилгачдын гаргадаг том алдаануудын нэг энэ. Дулаалгууд хоорондоо уулзаж байгаа хэсгийг сайн нийлүүлдэггүй. Энэ нь эргээд байшингийн булангуудаар агаар нэвтэрч шууд цан цохиж обой хууларч, паркет норж пэмбийх, дотоод заслыг эвдэлж мэдэгдэнэ. Үүнээс болж ахиад л нэмэлт зардлууд гарч эхэлдэг. Цаашлаад хөгц, мөөгөнцөр ургаж байшингийн хийцлэлийг гэмтээн, эрүүл мэндийг хохироож эхэлдэг.
Шууд гадагш гарч буй бүхий л төрлийн барилгын хэсгүүд маш сайн дулаалгатай, ямар ч нүх сүвгүй байх нь чухал байдаг. Зүүний чинээ нүхээр тэмээн чинээ жавар гэж эртний үг байдаг. Таны байшин хэр сайн дулаалгатай байхаас үл шалтгаалан аливаа хүйтэн агаар нэвтэрч байгаа хэсгүүд нь таны дулааны мөнгийг шууд гадагш нь цацаж байдаг.
Ер нь шууд гадаатай харьцаж байдаг бүхий л зүйлсэд дулаалгын болон битүүмжлэл сайтай байх стандарт байдаг. Ялангуяа яндан камен зуух гаднаас шууд агаар орж ирэхийг хамгаалсан хавхлаг суурилагдсан байх шаардлагатай. Та камен, зуух руугаа гараа хийхэд л шууд агаар орж ирж байгаа эсэхийг мэдэх боломжтой.
Монголчуудын хувьд нийтлэг гаргадаг том алдаа нь бохир агаар гаргах, цэвэр агаар оруулах агааржуулалтын системийг огт хийдэггүй эсвэл буруу хийгээд байдаг. Бохир агаар гаргах ганц хоолой хийдэг ч цэвэр агаар оруулах систем хийдэггүй. Эсвэл агаар сорох системийн хоолой бүдүүн нарийн байж агаарын даралтаар соруулах системийг өөрсдийн дураар буруу хийдэг. Энэ нь эргээд бохир агаарыг гадагш биш өрөө хооронд нь зөөх буруу систем болж хувирдаг. Гал тогооноос унтлагын өрөө рүү үлээх гэх мэт. Энэ нь эргээд эрүүл мэндэд хортой, дулаан алдагдалтай байх нөхцөл болж хувирдаг. Гэхдээ энэ нь огт агааржуулалтын систем хийх хэрэггүй гэсэн үг огтхон ч биш.
Та ердөө термометр ашиглаад л дулаан алдагдлаа их эсвэл бага байгааг илрүүлэх боломжтой. Лазер термометр эсвэл өрөөний жижиг термометр хэдэн ширхэг байхад л болно. Термометрүүдээ шал, хана, тааз, цонх, хаалга, өрөөний голд гээд боломжтой газрууддаа байрлуулах хэрэгтэй. Тухайн термометрүүдээ цаг тутам температурууд нь хэд байгааг бичиж тэмдэглэж ав. Тэмдэглэж авсан температуруудынхаа дунджийг гаргаад, өрөөний голд байгаа термометрээс бусад термометрүүдийн градус хэдээр зөрүүтэй байгааг харна. Дулаан алдагдалгүй байшин бол өрөөний хаана ч ижил температуртай байх ёстой гэсэн үндсэн зарчмаар дулаан алдагдлаа тодорхойлж байна гэсэн үг.
Температуруудын зөрүү их байх тусам тухайн хэсгийн дулаан алдагдал их байна гэсэн үг. Жишээ нь дээврийн (таазны) температур өрөөний температураас 4 градусаар бага, хананы температур өрөөний температураас 2 градусаар бага байгаа бол дээврээр илүү их дулаан алдагдаж байна аа гэсэн үг юм. Та дулаан алдагдлаа бүрэн тодорхойлохгүйгээр таамгаараа байшингаа дулаалбал цаг хугацаа, мөнгөө дэмий үрнэ. Тиймээс эд хүйтэрч байгаа энэ үед л байшингийнхаа дулаан алдагдлыг үнэн зөв, бүрэн тодорхойлж авах нь хамгийн чухал юм шүү.
Ehouse.mn Админ
