Газрын гүний дулааны нөөцийг тодорхойлох урьдчилсан суурь судалгааг хийнэ
admin
0
6
Монгол Улсын Засгийн газрын 2024-2028 оны үйл ажиллагааны хөтөлбөрт тусгагдсан гэр хорооллын дахин төлөвлөлт, орон сууцжуулалтын бодлогын хүрээнд иргэдэд таатай, эрүүл, аюулгүй, ногоон дэд бүтэц бүхий хотуудыг хөгжүүлэх төсөл, арга хэмжээнүүдийг хэрэгжүүлэхдээ байгаль орчинд ээлтэй, эдийн засгийн хэмнэлттэй дулааны тогтвортой эх үүсвэр болох газрын гүний дулааны нөөцийг Улаанбаатар хот орчимд тодорхойлох урьдчилсан суурь судалгааг хийх ажлыг Хот байгуулалт, орон сууцжуулалтын яам, Нийслэлийн Засаг даргын Тамгын газрын захиалгаар Монгол Улсын Шинжлэх ухааны академийн Одон орон, геофизикийн хүрээлэнгийн эрдэмтэн судлаачдын баг хийж гүйцэтгэх гэрээнд өнөөдөр /2025.02. 06/ гарын үсэг зурлаа.
Энэхүү ажлын үндсэн зорилго нь Улаанбаатар хотын газрын гүний дулааны потенциалийг тодорхойлох, үнэлгээ хийх, дулаан хангамжид ашиглах боломжийг үнэлэхэд урьдчилсан судалгаа хийж дүгнэлт өгөхөд оршино. Энэ ажлаар Улаанбаатар хот орчимд өмнө нь хийгдсэн геологи, гидро-геологи ба геофизик, геологийн судалгааны ажлын үр дүнгүүдийг нэгтгэн дүгнэж, боломжит байрлалд геофизикийн хэмжилт ба геохимийн дээжлэлт хийж дүгнэлт гаргах, Улаанбаатар хот орчимд өмнө хийгдсэн ба шинээр хийгдэх геофизикийн хэмжилтийг нэгтгэн боловсруулан тухайн орчмын геотермаль потенциалын зураглал зохиох, хэтийн төлөв бүхий талбайг ялгах зэрэг суурь судалгаа, боловсруулалт хийгдэх юм.
Судалгааны үр дүнд Улаанбаатар орчмын геотермаль потенциалын зураглал, Геотермаль болон Гидрогеологи резерварын шинж чанарыг үзүүлсэн концепцийн загвар болон зорилтот орон зайд нарийвчилсан 3D цахилгаан эсэргүүцлийн загвар гарч геологи, гидрогеологи, геохимийн тайлан боловсруулагдаж дараагийн шатны үйл ажиллагаануудад ашиглагдах юм.
