Зуурмагийг гадаргууд цацаж тэгшилж, өнгөлж бэхжүүлсэн бүрхүүл үеийг шавардлага гэнэ. Шавардлага нь барилгын дулаан хадгалах, дуу тусгаарлах, модон хийцийг өмхрөх ялзрах, галд шатах, хорхой шавьжнаас хамгаалах, төмөр хийцийг зэврэлтээс хамгаалах, эдэлгээг уртасгах ач холбогдолтой. Шавардлагын ажлыг чанартай сайн гүйцэтгэх урьдчилсан нөхцөл нь гадаргууг бэлтгэх ажил юм.

Шавардлагын үеийг шууд нэг мөр шавахад хананд тогтохгүй буцаж унан, бэхжиж хатахаараа хагардаг. Иймээс шавардлагыг дэвсгэр үе, тэгшилгээ үе, өнгө үе гэж 3 давхар шаварддаг. Шавардлагын үе тус бүр нь дараачийн үеийн дэвсгэр болж, бат бэхээр тогтоох нөхцөлийг бүрдүүлнэ.

Нэгдүгээр үе буюу дэвсгэр: Гадаргууд зуурмагийг цацаж, нялж тогтоохийг дэвсгэр үе гэх ба цацах, нялах 2 аргаар гүйцэтгэнэ. Дэвсгэр үе нь гадаргуугийн нүх сүв, хонхор, хотгор, өө сэвийг арилгах, барзгар болгох, барьцалдах чанарыг сайжруулах зорилгоор хийгдэнэ. Зуурмагийн конусын живэлт 8-12 см шингэвтэр байна. Шавардлагын үеийн зузаан нь 3-5 мм байна.

Хоёрдугаар үе буюу тэгшлэх: Шавардлагын үндсэн хэсэг бөгөөд цацсан зуурмагийг шууд тэгшлэх, булан ирмэг гаргах, хонхор гүдгэрийг тэгшлэх ажиллагаа юм. Зуурмаг нь 7-9 мм-ийн конусан живэлттэй байх ба шавардлагын үеийн зузаан нь 5-7мм байна. Энгийн шавардлагыг цацах, тэгшлэх 2 үеэр хийнэ.

Гуравдугаар үе буюу өнгөлгөө: Сайн чанарын шавардлагыг дэвсгэр, тэгшилгээ, өнгө үеэр шавардана. Тэгшилгээ хийсэн гадаргуугийн барзгарыг арилгаж, жигд гөлгөр болгох, ирмэг буланд гарийн засал хийх, будгийн ажлын дэвсгэр үе болгох зорилгоор өнгөн үеийн шавардлагыг хийнэ. Зуурмагийн найрлага нь 60%-ийн устай 12см конусын живэлттэй 1.5мм-ийн нүхтэй торонд шигшсэн цөцгий маягийн шингэн зуурмаг байна. Шавардлагын зузаан нь 2мм-ээс хэтрэхгүй байна.

Эх сурвалж:  Үндэсний бүтээн байгуулалтын корпораци