Байшин барихад маш олон төрлийн материал худалдан авах хэрэгтэй болдог. Энэ олон материалыг цуглуулж авах гэж маш их цаг зарцуулна. Та энэ олон материалыг худалдан авахдаа бэлтгэлтэй байх хэрэгтэй. Эдгээр материалууд дотроос цемент нь байшин барихад хамгийн их хэрэгтэй нь юм. Цемент нь цаасан эсвэл шуудайтай, голдуу 50 кг савлагаатай байна. Цемент худалдан авах нь мөн зөв цементийн төрлөө сонгох болон зөв нийлүүлэгчээ сонгох нь чухал.

 Тэгэхээр танд цемент худалдан авах үед тань тус болох хэдэн зүйлийг хэлж өгье.

1. Цемент бол хамгийн өргөн хэрэглэгддэг барьцалдуулагч материал. 

Иймд маш олон зориулалтаар хэрэглэж болно. Жишээ нь: Төмөр бетон каркасанд, ханын шавардлаганд, шал цутгахад, ханын өрлөг гэх мэт. Зориулалт нь танд ямар цемент хэрэгтэйг тодорхойлно. Танд өөр өөр зориулалтын өөр өөр төрлийн цемент хэрэг болно.

2. Цементийн шинж чанар болон чанарын үзүүлэлт.

 А. Таны хэрэгцээнд нийцэх олон төрлийн цемент зах зээл дээр зарагдаж байгаа. Гэхдээ хамгийн түгээмэл хэрэглэдэг 3 төрөл нь:

• Ердийн портланд цемент
• Портланд пуццолан цемент.
• Цагаан цемент

Б.  Цементийн анги:

Ууттай цемент худалдан авах үед танд ямар анги марктай цемент вэ гэдгийг мэдэх нь чухал юм. 32.5 , 42.5, 52.5 гэх мэт цементийн бат бэхээр нь ангилан нэрлэсэн байдаг. OPC 42.5 гэдэг нь Ordinary Portland Cement буюу Ердийн портланд цемент гэсэн үг.  42.5 бол цементийн бат бехийг заасан тоо буюу анги нь юм. Энэ нь цементийн шахалтын бат бэх нь 28 хоногийн дараа лабораторт шахагч машинаар эвдэж туршихад 43 Н/мм2 бат бэхийг үзүүлэх ёстой гэсэн үг. Цемент нь устай урвалд орж бэхжилт явагдаж хатуурдаг тул та бороо ус орхооргүй хуурай газар газраас хөндий хурааж хадгалах хэрэгтэй.

3. Төсөв мөнгө

Цемент нь байшин барихад гол материалуудын нэг тул та түүнийг хэмнэнэ гэсэн ойлголт байж болохгүй. Хэрэглэх зохистой хэмжээгээр нь хэрэглэх нь зүйтэй.  Хэрвээ таны төсөв хүрэлцэхгүй байвал бусад туслах материалуудын зардлаа хасаж, хэмнэлтээ гаргах талаар бодох хэрэгтэй. Танд 1 сая төгрөг байсан гэж бодъё. Түүнийхээ 300 мянгаар нь цемент авч байж хүрэлцэх байтал төсвөө хасаж, 200 мянгыг зарцуулж болохгүй л гэсэн үг. 300 мянган төгрөгөөрөө цементээ аваад, үлдсэн 700 мянгадаа туслах материалаа тааруулж авсан нь зөв. 

4. Авах тоо хэмжээ

Та мэргэжлийн хүн биш бол бага зэрэг төвөгтэй ажил болж хувирна. Хэдэн шуудай цемент надад хэрэг болох бол гэж багцаалдан суух нь дамжиггүй. Тэгвэл  1 давхар байшингийн сууринд 1 м3 бетонд 250- 300 кг гэж тооцоорой. Харин Ханын шаварт 1 хүрз цемент 3 хүрз элс гэж бодоорой. Харин ханын  нийт талбайгаа гаргаад 1 м2 талбайд дунджаар 0.02 м3 шавар зуурмаг орно. Элс-Цементэн зуурмагын жин ойролцоогоор 1м3 нь 2000 кг байдаг. Та 100 м2 талбай шавардана гэж үзвэл 100х 0.02=2 м3 зуурмаг орно. 2м3х 2000= 4000 кг зуурмаг. 4000:4=1000 кг буюу 1 тон цемент 3000 кг элс (1600 кг/м3 ) буюу ойролцоогоор  1.87 м3 элс хэрэг болно гэсэн үг.

5. Цементийн насжилт

Цемент нь удаан хугацаанд хадгалдаг материал биш юм. Үйлдвэрлэгчдийг зүгээс ер нь 3 сараас дээш хадгалсан цемент хэрэглэхгүй байхыг зөвлөдөг. Тэгэхээр яг хэрэг болох үедээ л худалдан авах хэрэгтэй гэсэн үг. Хугацаа хэтэрсэн бол барьцалдах чадвар нь буурч бат бэх нь багасана гэсэн үг. Мөн цементийн чанарт хадгалах орчин чухал. Хэрвээ та чийгтэй орчинд хадгалсан бол агаар дахь чийгтэй цемент нь урвалд орж хатуурч чулуужсан байдаг. Иймд хуурай газар хадгалсан цемент авах нь зөв.

6. Чанарын гэрчилгээ болон шинжилгээний бичиг

Та цемент авахдаа чанарын гэрчилгээ болон шинжилгээний бичгийг нь асууж аваарай. Дараа нь танд өөрийн барьсан байшингаа үл хөдлөх хөрөнгөөр бүртгүүлэх болон эсвэл та барилгаа улсын комист хүлээлгэн өгөх үед акт бичиг баримтанд хавсаргадаг юм. Хэрвээ та хүний захиалгаар байшинг нь барьж өгч байгаа бол захиалагчдаа үзүүүлж мөнгөө авана гэсэн үг.