Цементийн үнийн өсөлт бодит эсэхийг шалгаж тогтоох үүрэг өглөө
admin
0
11
Цементийн үйлдвэрүүд үнээ 15-30 орчим хувиар өсгөөд байна. Энэхүү өсөлт нь бодитой нэмэгдэл мөн эсэх, ямар шалтгаан нөхцөлтэй болохыг тогтоох үүднээс Монгол Улсын шадар сайд С.Амарсайхан БХБЯ-нд ажиллалаа. Энэ үеэр Барилга хот байгуулалтын дэд сайд Э.Золбоо тэргүүтэй яамны холбогдох газар хэлтсийн удирдлагууд цементийн үнэ нэмэгдсэн шалтгаан нөхцлийг танилцуулж, мэдээлэл өглөө.
Манай улс 2015 оноос хойш дотооддоо цемент үйлдвэрлэж, өнөөдрийн байдлаар цементийн хэрэглээгээ 100 хувь дотоодоосоо хангаж байна. Үйлдвэрлэгч нарын хувьд цахилгааны үнэ өссөн, цахилгаан түгээх шугам ойр ойрхон эвдэрч, эрчим хүч тасалддаг байдлаас болоод жилийн турш тасралтгүй ажиллах ёстой машин зогсдог. Зогссон машиныг дахиж ажиллуулахад маш их цаг хугацаа ордог, нүүрсээ хангалттай хэмжээнд татаж чадахгүй байна гэхчлэн шалтгаан нөхцөл үүссэн талаарх мэдээллийг Барилга, хот байгуулалтын яамнаас танилцуулсан.
Монгол Улсын шадар сайд С.Амарсайхан мэдээлэлтэй танилцаад аж ахуй нэгжүүд импортыг орлох бүтээгдэхүүн үйлдвэрлэж, дотоодын хэрэгцээг хангана гэж Хөгжлийн банкнаас зээл авч, үйлдвэрүүдээ байгуулсан. Тийм учраас үндэслэлгүйгээр зохиомлоор үнээ хэт өсгөж болохгүй. Мэдээж үнэ зах зээлийн зарчмаараа тогтох ёстой ч бодитой байх ёстой. 2022 онд барилгын салбарт хийгдэх 3,8 их наяд төгрөгийн хөрөнгө оруулалт, бүтээн байгуулалтын ажил үнийн хөөрөгдлөөс болж гацаж хойшлох ёсгүй, мөн ард иргэдийн худалдан авах орон сууцны үнэнд хөөрөгдөл үүсгэхгүй байх үүднээс бүхий л талын арга хэмжээг авч ажиллах чиглэл өглөө.
Мөн Төрөөс нүүрсний тээврийн үнэ, эрчим хүчний тасалдал зэрэг асуудал дээр нь аж ахуй нэгжүүдийг хэрхэн дэмжиж хамтарч ажиллах боломж байна вэ гэдэг дээр гарц гаргалгаа хийх, БХБЯ, ШӨХТГ-ын хамтарсан ажлын хэсэг байгуулж, нэн яаралтай аж ахуй нэгжүүдэд шалгалт оруулж, асуудлыг яаралтай хянаж тогтоох хугацаатай үүргийг өглөө.
