Ц.Даваасүрэн: Газрын тухай хууль тогтоомжийн нэгдмэл байдлыг хангах зайлшгүй шаардлага бий болсон

Ц.Даваасүрэн: Газрын тухай хууль тогтоомжийн нэгдмэл байдлыг хангах зайлшгүй шаардлага бий болсон

admin admin
2023-02-6 - 11:28 Шинэчлэгдсэн: 2023-03-16 - 11:28
0 2
Ц.Даваасүрэн: Газрын тухай хууль тогтоомжийн нэгдмэл байдлыг хангах зайлшгүй шаардлага бий болсон

Газрын багц хууль болон геодези, зураг зүйн хууль, хот байгуулалтын тухай хуулийн шинэчилсэн найруулгын төслийг танилцуулах нээлттэй хэлэлцүүлгийг Төрийн ордонд зохион байгууллаа. Энэ үеэр УИХ-ын гишүүн, БХБ-ын сайд Ц.Даваасүрэн үг хэлсэн юм. Тэрбээр "Өнөөдөр хүчин төгөлдөр мөрдөгдөж буй Газрын тухай хууль 2002 онд батлагдсанаас хойш бусад хуулийн өөрчлөлттэй холбоотойгоор нийтдээ 32 удаа нэмэлт өөрчлөлт орсон байна. Өнөөдрийн байдлаар нийт 60 гаруй хууль, 200 орчим захиргааны хэм хэмжээний актаар газрын талаарх зохицуулалтыг нэмэлтээр бий болгосон нь зэрэгцэн үйлчилж, хууль тогтоомжийн давхардал, хийдэл, зөрчлийг бий болгож, хэрэглэгч болох төр, орон нутгийн байгууллага, иргэн, хуулийн этгээдэд эрх зүйн ойлгомжгүй байдлыг үүсгэж байгаа тул Газрын тухай хууль тогтоомжийн нэгдмэл байдлыг хангах зайлшгүй шаардлага бий болсон юм. Иймд “Монгол Улсын газар нутаг салшгүй бүрэн бүтэн, газрын сан нэгдмэл байх”, “Газар нь төрийн хамгаалалтад байх, хүн амын эрүүл мэнд, байгаль хамгаалал, үндэсний аюулгүй байдалд харшлах аливаа үйл ажиллагаа явуулахгүй байх”, “Газрыг хуульд заасан нөхцөл, журмын дагуу ашиглах, хамгаалах, нөхөн сэргээх, учруулсан хохирлыг нөхөн төлүүлэх, гэм хорыг арилгуулах”, “Газрын талаарх мэдээлэл ил тод, нээлттэй байх” зэрэг үндсэн зарчмуудыг тусгаж багц хуулийн төслийг боловсрууллаа.

Одоогийн байдлаар 370 гаруй субьект газар олгох шийдвэрийг гаргаж байна. Эдгээрийн дийлэнх нь сайд болон аймаг, нийслэл, сум, дүүргийн Засаг дарга нар буюу улс төрийн албан тушаалтан байна. Иймээс энэ байдлыг өөрчилж, иргэд, олон нийтийн саналыг тусган боловсруулж, аймаг, нийслэл, сум, дүүргийн Засаг даргын өргөн мэдүүлж, иргэдийн Төлөөлөгчдийн Хурлын баталсан төлөвлөгөөний дагуу Газрын мэргэжлийн байгууллага газар олгох асуудлыг нээлттэй дуудлага худалдаа, төсөл сонгон шалгаруултын зарчмаар цахим системээр шийдвэрлэх, гаргасан шийдвэртээ дээд шатны байгууллагын өмнө өөрөө хариуцлага хүлээдэг тогтолцоог бүрдүүлэхийг зорилоо.
Өнөөдрийн байдлаар 7 дэд систем, 2 мэдээллийн сан бүхий Газрын нэгдмэл сангийн удирдлагын системээр дамжуулан төлөвлөх, олгох, бүртгэх, үнэлэх, татвар төлбөр ногдуулах, газрын төлөв байдал, чанарыг хянах, нөхөн сэргээх, хамгаалах газар зохион байгуулалтын цогцолбор арга хэмжээг хэрэгжүүлэн ажиллаж байгаа бөгөөд хууль батлагдсанаар энэхүү газрын нэгдмэл сангийн удирдлагын нэгдсэн системийг бүрэн утгаар нь ашиглах хууль, эрх зүйн орчин бүрдэнэ" хэмээлээ.